#تجربة_النسيان
قالوا ان...
"الانسان صفته النسيان"
نفس حروف الكلمتين واحدة
كتير من الحاجات إلى الانسان بيمر بيها
مع الوقت بينساها
ويمكن دى من رحمة ربنا بينا
عشان نقدر نعيش
فبننسى الحزن
وننسى الزعل
وننسى الوجع
وننسى الفراق
وننسى حاجات كتير اوى
كانت ممكن تألمنا لو فضلنا فاكرينها
ده النسيان الحميد او المطلوب
والى مفيش منه ضرر بالعكس نافع
لكن النسيان المضر او السىء والى المفروض نحاربه
والى مراحل متأخرة منه بتكون مرض (الزهايمر ) هو إلى بيتعبر فى كتير
من الأوقات علامة من علامات التقدم فى العمر او الشيخوخة ..
لكن لو انت لسه صغير وبتنسى كتير
بتنسى بشكل ملحوظ
تنسى مفاتيحك
تنسى موبايلك
تنسى ميعاد مهم
تنسى كل الى ذاكرته
تنسى حاجات كتير المفروض متنسهاش
يبقى لازم تاخد بالك
لان الأمر بقى منتشر بين كتير مننا
وبقينا بنتعامل معاه على انه أمر طبيعى
لكنه فى الحقيقة هو مش طبيعى وغلط وبيأثر على حياتنا اليومية بصورة
كبيرة
وده إلى خلى كتير من الباحثين والأطباء ينتبهبوا لخطورته ويبحثوا فيه
وينبهبونا لأسبابه
ويدلونا على طرق لمحاربته او علاجه
فوجد الأطباء والباحثين ان أسباب ضعف الذاكرة عند الشباب إلى المفروض يكونوا فى كامل تركيزهم وذاكرتهم نشطة باستمرار هى :
قلة النوم والسهر إلى بيأثر بشكل كبير على خلايا المخ فبيأدى الى
ضياع الأشياء من الذاكرة وعدم ثابتها
كمان التعب والإجهاد الذهنى والبدنى
بالإضافة للحوادث إلى لا قدر الله ممكن البعض يتعرض لها فبيكون من
الآثار المترتبة عليها ضعف الذاكرة
كمان العادات السيئة زى التدخين إلى بيأثر على صحة الانسان فى كل
النواحى ومن ضمنها خلايا المخ المسئولة عن تخزين المعلومات
واحيانا بعض الاضطرابات فى الغدد وخاصة الغدة الدرقية بتأثر بشكل
كبير على قدرة الانسان على تذكر الأمور
والمرأة الحامل طبعا أحد أعراض الحمل النسيان وعدم التركيز
كمان الاضطرابات النفسية والاكتئاب والخوف والتوتر بيأثروا بشكل كبير
على الذاكرة وبيضعفوها جدا
واحيانا بيكون النسيان اثر جانبى لبعض الأدوية
ولأن أغلبنا طول الوقت عايش فى توتر واجهاد ومعظمنا بيسهر لوقت طويل
ومبياخدش كفايته من النوم وكلنا تقريبا بنتعرض على الأقل لسببين او تلاتة من أسباب
ضعف الذاكرة إلى ذكرها الأطباء كان لازم ندور على علاج للمشكلة دى
فمن طرق علاج النسيان بكثرة او ضعف الذاكرة
التغذية السليمة
والنوم الجيد
وممارسة الرياضة
والبعد عن العادات السيئة زى التدخين
كمان فى طرق تخلينا تقدر نستعيد نشاط ذاكرتنا ونقويها وفى أنواع اكلات معينة وأعشاب معينة وتمرينات ذهنية كمان إلى بيمارسها ذاكرته بتتحسن كتير وبيبطل ينسى
فمثلا من الأكلات والأعشاب إلى بينصح الأطباء بكثرة تناولها للحصول
على ذاكرة صحية
الأسماك
والعنب
والباذنجان
والسبانخ
والبصل
والثوم
والزعتر
والروزمارى
اما التمارين والعادات إلى بتساعدنا على تقوية الذاكرة وتخلينا نبطل ننسى فمنها :
- نتعود على وضع الأشياء فى مكان محدد باستمرار يعنى الموبايل فى نفس
المكان والفلوس فى نفس الجيب والمفاتيح وهكذا
- نتعود اننا ندون المعلومات لان كتابة الأشياء بتساعد على تذكرها
بسهولة عشان كده كانوا دايما بيقولونا احفظوا بالكتابة
- نحتفظ بدفتر لليوميات نكتب فيه المطلوب مننا نعمله او ايه إلى ورانا
وكده
- كمان نستخدم منبه الموبايل عشان صوته دايما يفكرنا بالمواعيد
- ونحاول طول الوقت نكرر على نفسنا المعلومات المهمة
- كمان ممارسة بعض التمارين الذهنية بتنشط الذاكرة بصفة مستمرة زى حل
الالغاز والكلمات المتقاطعة وحتى بدون كلام ولعبة الأفلام وأتوبيس كومبليت كلها
حاجات وان بدت بسيطة الا انها بتنشط الذاكرة بصورة دايمة
هو النسيان نعمة صحيح بس مش هيبقى نعمة خالص لو دخلت الامتحان ونسيت
كل الى ذاكرته !!!
ليست هناك تعليقات:
إرسال تعليق