النجاح هو الجزء الأصغر من التجربة .
هو القدرة على تحقيق التميز .
النجاح هو أن تستفيد من أخطائك وأخطاء الغير.
النجاح هو
مليون تفسير لمعنى النجاح وكل تفسير غير التانى. .
النجاح ممكن نختلف فى معناه او تعريفه لكن مش ممكن ابدا نختلف فى الإحساس
بيه
لو جبنا عشرة وسألناهم
عن معنى النجاح بالنسبة لهم؟ !
كل واحد هيقول حاجة غير التانى
لان كل واحد نجاحه غير التانى
النجاح هو انك تبقى عايز تعمل حاجة .. وتعملها .. ايا كان ايه هى
الحاجة دى !
إلى مبيعرفش يعدى الطريق لوحده
ونفسه يعرف يعديه لوحده
وبيجرب
ومبيعرفش
ولازم كل مرة حد يساعده
اليوم إلى هيجى ويقدر فيه يعدى الطريق لوحده من غير مساعدة اى حد
هيحس بطعم النجاح!!
وهو نفسه الإحساس إلى هيحسه الى بقاله عشر سنين بيحضر فى رسالة
للدكتوراه وأخيرا بيناقشها ويسمع من أساتذته أنه تم منح الباحث فلان الفلانى درجة الدكتوراه مع مرتبة الشرف.
مش لازم تكون أشهر واحد فى العالم
ولا اغنى واحد فى العالم
ولا اجمل واحد فى العالم
ولا اشطر واحد فى العالم
ولا افعل التفضيل فى كل حاجة فى العالم
عشان تبقى بنى آدم ناجح
النجاح مش بالمعايير المادية إلى العالم المادى بيحددها إطلاقا!
!!
نجاحك انت إلى هتحس بيه
مش الناس
نجاحك هو انك تحقق هدفك انت مش تحقق الهدف إلى كل الناس عايزاه
كم من الحكايات إلى سمعناها
عن ناس وصلت فى شغلها
لدرجة كبيرة جدا
وعندهم كل حاجة
وكل العيون بتبصلهم على انهم المثل إلى ياريت نبقى زيه
وفجأه الناس دى سابت كل حاجة
وراحو مجال مختلف تماما
وبدأوا فيه من الصفر
ولو سألتهم ليه
هيجاوبوا لأن ده الى احنا عايزينه
ده هدفنا
مش إلى كنا بنعمله قبل كده !!
عشان كده فى مقولة بتقول ان النجاح مرتبط بالسعادة
فلو وصلت لمكانة كبيرة فى مجال ما او فى علاقة حتى وكل الناس شايفينك
ناجح بس انت مش سعيد
اعرف ان ده مش مكانك وان النجاح ده مزيف
مش حقيقى
لأنك لو ناجح فعلا هتكون سعيد !!
وبعض العلماء أقروا ان فى أصول للنجاح
اولا انك تحدد هدفك
ثانيا تضع خطة للوصول لهدفك
ثالثا تعمل وفقا للخطة الموضوعة
رابعا وخامسا وسادسا تصبر ثم تصبر ثم تصبر
حتى تجد ثمار ما فعلت
وقبل كل ذلك عليك ان تتوكل على الله
وعليك ان تضع فى اعتبارك دائما ان الفشل ليس عدم النجاح ولكنه الجهل
بأسباب النجاح
وعلى سيرة الفشل
كتير من الى سبقونا قالوا ان الفشل خطوة من خطوات النجاح أو ربما يكون
محاولة غير موفقة ليه او غير صائبة .
وكتير من الناس بيكونوا نجاحين بس بيجلدوا ذاتهم اكتر من اللازم
ومبيقدروش يشوفوا الصورة صح
عشان كده فى بحث من ضمن ألاف الأبحاث بيقول انه فى 20 علامة بتدل على
نجاحك حتى لو انت مش حاسس وهما :
1- ان علاقاتك تكون سهلة مفيهاش دراما كتير بتكبر كده للامور وبتترفع عن الصغائر وبتغفر وتعدى وتسامح
2- وزى انك متكونش بتخاف تطلب المساعدة من حد لأن الناجح الحقيقى بيؤمن بقدرات غيره وبيثق فيها زى ما بيبقى واثق فى قدراته
3- وأنك تكون متمسك بمبادئك وبتترفع عن السلوك السىء حتى لو الى قدامك أساء سلوكه معاك مبتتعاملش معاه بالمثل بل بتتعامل بأخلاقك
4- وأنك تبتعد عن اى حد واى حاجة تخليك تحس إحساس سيىء وبتعمل بقول سيدنا عمر بن الخطاب (اعتزل من يؤذيك )
5- وأنك تكون بتحب نفسك مش بمعنى الزهو او الغرور او الانانية لا طبعاء بمعنى انك تتقبل نفسك شكلك شخصيتك ظروفك عيلتك
6- وأنك تكون بتقبل الخسارة وتكون عارف انه الدنيا مكسب وخسارة محدش بيكسب على طول ومحدش بيخسر على طول
7- وان يكون عندك أصحاب بيحبوك فعلا وقادرين دايما يدعموك ولو وقعت يسندوك بحبهم وتشجيعم ويرجعوك تانى تقف على رجلك
8- كمان من علامات النجاح إلى ذكرها البحث انك متكونش شكاى بتشتكى طول الوقت من كل حاجة واى حاجة
9- كمان انك تكون بتفرح لنجاح غيرك وبتشجعهم بكل إيجابية وحب ومبتغرش ولا بتغل دى علامة على نجاحك
10- بالإضافة طبعا لشغفك المستمر وقدرتك على المثابرة والمحاولة ونفسك الطويل
11- كمان ان يكون عندك هدف كبير بتحلم توصله
12- ويكون عندك أهداف صغيرة حققتها
13- وأنك تكون قادر تحس بيغيرك وتزعل عشانهم وتتعاطف معاهم
14- وان يكون فى حياتك ناس حقيقى بتحبها من قلبك وبتتمنلها كل الخير
15- وأنك ترفض انك تكون ضحية او مجنى عليك ومتنهرش لاى سبب او اى شعور مهما كان قاسى وكل ما تقع تقوم من تانى
16- وأنك متهتمش الناس شايفينك ازاى او بيقولوا ايه عنك لان رضا الناس غاية لا تدرك ومفيش حد الناس كلها اتفقت عليه حتى الانبيا
17- وأنك تكون بتدور دايما على النقطة البيضة فى اللوحة السودا وعينك بتقدر تشوف الجمال مهما كان القبح طاغى
18- وأنك تتقبل الأشياء إلى مش ممكن تغيرها
19- وتغير إلى تقدر تغيره
20- واخر علامة وأهم علامة هى أنك تحس انك سعيد وراضى.
لو علامات النجاح دى موجودة عندك اعرف انك ناجح ولو مش موجودة دور
على هدفك وخططله واسعاله حتى لو عندك مليون سنة عملا بالمقولة
إلى بتقول : ليس شرطا ان تكون يافعا وصغيرا لتنال النجاح ، الشرط ان
تكون جادا ومثابرا للوصول إليه .
النجاح بيتحس وبيتشاف وبيتلمس
اول ما هتنجح هتعرف على طول انك نجحت
النجاح حلو
مفيش حاجة احلى من انه يكون عندك هدف وتوصله
حلم بعيد فى خيالك وفجأة يبقى حقيقة بين إيديك...
ليست هناك تعليقات:
إرسال تعليق